Татар халкы – бөек халык. Яшь буынга да шушы фикерне сеңдерергә тырышырга кирәк. Татар халкының данлы тарихы бар. Сөембикәсе, Колшәрифе, бөек Тукае, меңәрләгән затлы шәхесләре бар. Без беркемнән дә ким түгел. Урыс халкы адым саен үзенең бөеклеге белән (булмаганны тагын да күбрәк итеп күрсәтеп) мактана икән, нигә без үзебезне кимсетергә тиеш әле? Без дә тарихның төбеннән күтәрелгән халык түгелмени?! Тарихын белгән халык үзе турындагы ялган-хорафатларга да ышанмый. Татар халкы үзенең тарихтагы урынын бик яхшы белә. Тукай да бик шәп белгән.

Без сугышта юлбарыстан көчлебез,

Без тынычта аттан артык эшлибез.

Шул халыкныңмы хокукка хаккы юк? –

Хаккыбыз уртак ватанда шактый ук!

    Яшь буынны яхшы мисаллар үрнәгендә тәрбияләү һәрвакыт отышлырак саналды. Гаилә һәм мәктәп никадәр ипле тәрбия бирергә тырышмасыннар, балаларыбыз тормышына йогынты ясый торган башка чаралар да җитәрлек. Бүгенге телевидениене, мәгълүмати чараларны күзәтеп барган һәр аңлы кеше белә булыр: болар бар да ата-ана, әби-бабай һәм мәктәп тәрбиясен арткы планга калдыра бара. Интернетта тискәре яктан бәяләнә торган төрле сайтлар, блоглар эзлекле рәвештә эш алып баралар. 

   Татарның гасырлар дәвамында калыплашкан тәрбия кануннары, рухи дөньясы бөтенләй юкка чыкмасын өчен, мин үз сайтымда халкымның игелекле уллары белән таныштыру максатыннан, материалларны бер урынга тупларга уйладым. Укучыларым даими танышып барсыннар өчен.

   Татар халкы ─ бик борынгы халык. Ул элек-электән терлек асраган, җир сөргән, иген иккән. Безнең халык ─ искиткеч тырыш, эшчән халык. Бу татарның борынгыдан килгән гүзәл сыйфаты. Шуңа күрә үз алдыма авылымның күренекле кешеләре белән таныштырып баруны да максат итеп куйдым.